Við vesturenda gatnanna Núpabakki, Ósabakki, Prestbakki, Réttarbakki eru gangstéttarhellur sem settar voru þegar hverfið var byggt. Hugsunin var að börn úr þessum götum á leið í Breiðholtsskólann gætu gengið þarna meðfram húsunum. Þessar hellur eru núna að kafna í gróðri og mosa því það hefur gleymst í tímanna rás að hreinsa og viðhalda þessu. Það felst ekki mikill kostnaður í að endurnýja þetta - unglingavinnan gæti jafnvel tekið þetta verkefni að sér á vordögum.
Það væri til mikilla þæginda og fegrunar að hreinsa þessar hellur og viðhalda gamalli og góðri hugmynd - börnunum og hverfinu til góða. Það á ekki að kosta mikið að hreinsa hellurnar, skipta út þeim sem eru brotnar, kanntstinga og hreinsa grasið frá hellunum sem núna er að ,,drekkja" þeim eða færa í kaf. Þetta eru nokkurs konar ,,fornminjar" - jafngamlar hverfinu og vel þess virði að laga og gera nýtilegt aftur.
Ég tel að viðhalda eigi góðum gönguleiðum fyrir skólabörn á leið í Breiðholtsskólann. Þessi gönguleið hefur verið vel hugsuð á sínum tíma en algerlega gleymst í Borgarskipulaginu eða hjá þeim sem sjá um endurnýjun og viðhald á göngustígum. Þetta er ekki hefðbundinn göngustígur - gangstéttarhellur settar niður með jöfnu millibili - þægilegt að þurfa ekki að klofa óslegið gras eða stóra skafla sem myndast á túninu við hliðina. Nýtist líka hundaeigendum sem ganga reglulega á þessum slóðum.
This content is created by the open source Your Priorities citizen engagement platform designed by the non profit Citizens Foundation